爆醬瀨尿牛丸之寡人白進化有感

     


「自從我食左爆醬瀨尿牛丸之後，腦筋靈活左，自信心番晒黎，每次考試仲得到100分添呀!」自從筆者經歷「進化」依個過程之後，我既感覺就好似八兩金係《食神》入面激讚爆醬瀨尿牛丸一樣，所以用依句說話黎開頭係絕不為過架！

有唔少既心理學家講過，人既自信心係建基於自我形象身上，自我形象高者，自信心也隨之而高，反之亦然。而自我形象，又可以分為「外在」同「內在」。「外在」既建構，某程度係根據「人靠衣裝，佛靠金裝」依個宗旨去運行。但係，「衣裝」點先為之好呢？筆者需要好鄭重咁同大家講，「衣裝」並非以牌子行先，就算比你著到成身名牌，但又唔整潔、又唔順眼、又唔識配襯，出黎既結果只會係俾人笑你「ＭＫ」（想知咩係ＭＫ，可以去香港網絡大典查詢），完全得唔到應有既效果。如果想外在形象「進化」成功，筆者可以舉少少竅門俾大家：（一）燙衫，千萬唔好將一件好似梅菜咁「巢」既衫著上身。（二）乾淨，任何被醬料、顏料沾染而又洗唔甩既衫就唔好再著啦。（三）統一，任何著上身既衫褲鞋襪，請盡可能保持同一風格，唔好上面恤衫，下面就整條波褲。（四）顏色，著上身既顏色最好唔好多過三種。（五）size，衣服既大小應以符合身型為主，衣不稱身只會令人覺得不修篇幅。只要跟足以上幾點黎「改裝」自己，雖然未必會令你既「桃花」突飛猛進，但至少唔會被人討厭。需知，做到不被討厭已經好重要，因為所有既愛情都係「又是互望開始，分手作結的...」試想想，你會想同毒男（女）拍拖定同正常男仔（女仔）拍拖？相信法官大人都唔洗出就已經有答案。

有左正常既外在形象，都唔擔保你會「進化」成功，因為仲要照顧埋「內在」。「內在」既「進化」，筆者認為可以從兩個大方向去做，其一是情緒智商（eq），另外是思維方法。情緒智商，由以下五個元素組成：（一）知道自己的情緒（二）懂得合理表達自己（三）控制欲望衝動的自制能力（四）理解別人的感受（五）懂得建立和譛的人際關係。只要根據上述五點去改造自己，首先能提升的，必定是待人接物既態度，從而又可以加強你既「親和力」。結果，對人友善ｄ，朋友多一ｄ，戀愛既機會又大ｄ。再來，就係思維方法既訓練，目的係要令自己凡事都可以諗多幾面，而唔係單一方法去處理。咁樣做既好處，除左可以睇落ｓｍａｒｔ一ｄ之外，亦可以提供更加多既意見比自己既（準）伴侶，可靠度、信心、安全感又可以提升至另一個層次，同你身上既稚氣講８８。

「進化」既過程就好似火雞（莫文蔚）用手打牛丸一樣咁艱辛，但「進化」既回報又會像八兩金所講咁。所以，不用怕，「悟以往之不諫，知來者之可追」，請大家努力，共勉之！