咁呢，其實呢，我就無整過容嘅。(謎之聲：你肯定?)
媽媽話齋，女大十八變嘛，我個樣其實同細個差唔多，都係眼(袋)大大，鼻細細，臉方方咁(再一次謎之聲：你肯定?)只不過當年年少無知，見人電鬈個頭好似好型咁就電埋一份，但又唔諗下方臉加爆炸頭成件事都會FAIL，最後搞到實驗失敗大爆炸咁，連男朋友都睇唔過眼，最後分手收場。
當然劇情需要，呢個時候嘅我應該會日日以淚洗臉，仲會不顧身世、自暴自棄、化悲憤為食量……
好在小女子無野多，最多係自信(謎之聲：睇篇名就知)，但日日見住個頭唔襯面，面又唔襯頭嘅失敗之作，實在無曬心機，加上天生貪靚，唯有的起心肝改造自己啦。首當其衝當然係髮型同衣著，呢方面，我就話豐斂由人嘅，我地版主Lazyman〈變變變生命力之lazy脫殼〉同 獨樂樂不如眾樂樂〈獨獨有態度〉都分別分享過若干心得。
今次一於分享下我少少進化心得。
我一直深信有自信嘅人總係比較Charming，莫論男女，咁到底自信除左好似寡人白響〈爆醬瀨尿牛丸之寡人白進化有感〉講嘅兩個大方向外，實際上又應該如何表現呢?由小習慣講起，有三樣~~~
1. 眼神
我唔係梁朝偉，唔識教大家用眼神放電，亦唔係明星御用化妝師 Rick Chin，唔會教大家畫靚靚眼妝，所以我講眼神係著重於同人地嘅眼神接觸，即係對話嘅時候要望住人地嘅眼睛，如果唔想或唔敢直望人地對眼，可以望眉心，效果一樣，因為堅定而有力嘅眼神會帶俾人誠實、有自信嘅印象。
2. 笑容
英國兩性研究作家ANDREW TREES《解密愛情》指出平均會笑35次嘅女性比只係外表美麗嘅女性更具吸引力，因為研究指出，一個原本被認為唔吸引嘅人如果展現笑容，其他人可能會轉而認為頗為吸引。呢層當然同自信有關，你無聽過咩，有自信嘅男/女人係最吸引人o架，所以，有整齊潔白靚牙嘅你，請儘量展露你最陽光燦爛嘅笑容，當然缺乏靚牙者微笑亦可。
3. 步伐
難度要大家行到好似名模咁?
唔會啦，畢竟小女子都唔係43吋長腿(34就應該有嘅)，我所講嘅步伐重點在於要有名模步伐般表現出黎嘅果份自信，抬起頭，挺直腰背，眼望前方，唔好再一味對住電話撳撳撳喇!
羅馬都唔係一日建成啦，何況自信?
我就話自信自信由自己開始信，所以我經常自稱美女牛，講講下人地就會潛意識咁認為係o架喇~~ (謎之聲：同啊Q精神勝利法有咩分別?)
今日開始，昂首闊步啦!
(謎之聲：其實講到最後佢想同大家講佢好有自信= 好Charming......所以我深信佢應該無去到整容，而係去左入邪教囉)
沒有留言:
張貼留言