「地區化」與「城市化」

話說最近有份關於「民族化」同「世界化」既功課，搞到經常諗下諗下咁既樣。筆者係做「諗樣」既途中，忽發奇想，腦海入面突然浮現出一個問題：擇偶，究竟係要「地區化」定「城市化」好呢？

「地區化」同「城市化」依樣野配落擇偶到，我估大抵應該同交通有關。「地區化」，看文思義，就係按「地區」黎擇偶，對象住得遠或近黎可作為考慮與否既條件。依個擇偶方式有一個好處，就係當大家真係起埋一齊果陣，可以免去好多坐車搵大家既時間同交通費。各位，真係唔好睇少依ｄ望落唔多起眼既時間同金錢。打個比喻，當你一星期至少會搵你既「蜜糖」3次，每次要用$20車錢同2小時來回，單單一年你已經洗左＄2880同288小時係坐車依個過程入面，而你既人生就係咁虛耗左。除此之外，「地區化」既伴侶，更加好既地方就係可以擁有更多「即興見面」。「即興見面」既意思姐係無事前預約，無啦啦半夜三更想見就見果種。依種見面方式既增加，好大程度上係因為大家住得近，唔需要抽好多時間出黎就可以見到對方所至。照筆者身邊既朋友仔黎睇，連Ｘ佳同學同佢既「蜜糖」可算係依種擇偶方式既表表者（好似係）。而以我所知，佢地亦因為咁而擁有一段非常甜蜜同穩定既關係。不過「地區化」既擇偶方式都有缺點架；就係尋找對象既範圍會「窄」左，少咁ｄ目標比你去選擇。而且，如果你過份著重依一點的話，仲好容易比人覺得你膚淺添，所以真係要小心處理事呀。

講起擇偶既範圍，「城市化」擇偶方式就擁有壓倒性既優勢。「城市化」既擇偶方式，因為以整個城市作為尋找單位，自然會對住得遠或近依個問題看輕一ｄ。「城市化」以成功拍拖作為大前題，理得你住邊都好，總之唔係係第二個國家就得。咁樣尋覓對象，「漁翁撒網」係常用既方法，因為唔洗理佢住邊，少左樣顧慮，可供選擇既目標就會多好多，投放既目光又廣一Ｄ。但係喎，「食得咸魚抵得渴」，萬一對方同你住既地方係「天南地北」都好，只要你一日有愛，你都要接受依種漫長既交通時間同沉重既車馬費，絕不能始亂終棄。男士既話，係依部分可能需要付出更多（「管接管送」是常識吧？），不要做個沒風度的男士。不過所謂世事無絕對，漫長既交通時間其實都可以當為增進感情、互相溝通既時間。筆者班上偉大既學生領袖李讓ｘ就係其中一個例子啦（好似係）。李同學佢同佢既（ｄ？）愛侶各自既地方雖然係天各一方，每次見面都要「二萬五千里路長征」，但佢地都不畏於此，更加係樂於奔疲，非常享受每次「長征」既過程，當中既樂趣真係可見一班。

黎到依到，「地區化」又好，「城市化」又好，最重要係你對對方有愛先好。筆者分享依篇文章，並唔係要求各位用死一種擇偶方式，而係想俾多ｄ既想法大家，等大家可以更周全咁考慮各種因素，以免急於「脫獨」而狗衝誤事。

P.S：有關其他既擇偶條件，可參考尾女牛既〈嚴選對象〉。